Buon Natale
Buon Natale a tutti,
ai longhi e ai curti,
a chiddi cu i causi ranni
e a chiddi senza mutanni,
ai granni e ai nichi,
ai nuovi e all’antichi,
ai sani e ai malati,
sciancati, e struppiati,
ai ricchi e ai pureddi,
a cu mancia carni
e a cu arricioppa cavuliceddi,
a cu ci piaci manciari
e a cu unn’avi mancu culu pi cacari,
a vescuvi e parrini,
vìriti la missa e sgangacci li rini,
ai carciarati chi su dintra ancora:
cu a nova leggi su tutti fora,
a nfirmeri e duttura,
a bidelli e prufissura,
a ngigneri e muratura,
a viddani e piscatura,
a l’avvocati , raggiunieri,
parrucchieri e varberi,
a li patruna di li supermercati
e a li commessi sfruttati,
a li patruna di li ristoranti,
ai cammarieri e ai suprastanti,
a cu passia cu u machinuni
e a cu unn’avi mancu un scarpuni,
a tutti li travagghiatura
chi ghiettanu sangu e surura,
a li disoccupati e nullatenenti
nca unn’annu chi mettiri sutta i denti
Buon Natale a tutti li mafiusi,
rugnusi, fitusi, schifiusi e arrusi,
chi i chiuvissiru nta i galeri
cu i catini a li peri,
Buon Natale a tutta la genti
ca paga u pizzu e un si nni penti:
ognuno è libbiru di farisi nculari
e di pruvarici piaciri, macari.
Buon Natale a lu guvernu
nca si nn’issi rittu a u nfernu,
a sinatura e deputati,
speciarmenti a chiddi cunnannati,
s’inn’issiru a travagghiari strati strati,
Buon Natali ai vicchiareddi,
ai ranni e ai picciutteddi,
ai lari e ai beddi,
ai riavuli e all’ancileddi,
ai nonni e ai niputi,
ai boni e ai curnuti,
a cu accatta e a cu vinni,
a cu acchiana e a cu scinni,
a cu chianci e a cu riri,
a cu criri e a cu un criri,
a cu campa a iurnata
e si licca a sarda salata
e a cu avi i miliuna a palati
e si nni futti d’i disgraziati,
- Auguri chi lu Bammineddu
ni purtassi un annu chiù beddu!!!
(Salvo Vitale)