A Pippinu ‘Mpastatu mmazzatu du putiri* (Domenico Mostaccio)
Ricevo e pubblico questa poesia
A Pippinu ‘Mpastatu mmazzatu du putiri*
Pippinu picciriddu
vantu da famigghia
‘nteliggenti e dirittu
di paroli na mitragghia
Parenti assai ‘mpurtanti
‘nta tuttu lu paisi
prucissioni i scuppuliamenti
’nto feudu di Cinisi
‘Nta gghiazza u comiziu
d’un cristianu russu
u so parari nun è sfiziu
ma gorgoglìu di puzzu
‘Nte vini du carusu
nova la vintata
pi tanti ieni un streusu
a so vita ora na ‘nchianata
Dumani assicuratu
c’un patri vuci i lupara
ma iddu ieni onuratu
sulu a canciari strada
Si occupunu i terri
Pippinu è chi viddani
u putiri mmustra i ferri
un pugnu tanti mani
Ma tanti mani un pugnu
suli nun ci a fannu
si ccu avi a battiri u cugnu
già pensa o so di cumandu**
Pippinu sangu pacciu
di cettu nun s’arrendi
da radiu faci u spacciu
d’idee so tremendi
Chi so cumpagni attacca
a genti assai onurata
ruffiani e menza tacca
padruni d’ogni strada
Si risentunu fotti
chiddi da lupara e di catta bbullata
già s’incammina a motti
lenta supra a so strada
Cu patri na battagghia
figghiu disunuratu
picchì ‘nta sta famigghia
stu ‘nfami disgraziatu
Nun sulu lingua longa e cauddu di testa
ma puru comunista
chi mali fici a Cristu
pi na condanna i chista
A mamma puviredda
c’assai nni patìu
capìa chi dda stidda
nun era pi ddu schifìu
‘Nto cori ci liggìa
megghiu di tutti quanti
na vaddata già u sapìa
chi nun c’erunu santi
Nun c’erunu ‘mpidimenti
ca ci canciaunu a testa
troppi li lamenti
di ddu mundu chi non canusci festa
E a festa ci a ‘mpuparu
l’amici so cchiù stritti
o patri onuratu
‘nta na notti i stiddi fitti
Nessuna prutiziuni
pi ddu figghiu tistardu
sulu a prucissiuni
da motti cu so dardu
Di la mamma lu grandi amuri
nnè chiddu di cumpagni
basta a pruteggiri ddu ciuri
di tutti ddi magagni
“Nuddu mmiscatu cu nnenti”
ci dissunu chi iera
ma di so ‘ntindimenti
no smuvìa mancu la lupara
‘Mpastatu facìa di nomi
limpida a so simenza
luttava cu dd’‘nfami
gridando uguaglianza
Ma nun ci fu putenza
signatu u so distinu
‘nta quattro mura i stanza
dicideru u so caminu
Pigghiatu fu di notti
puttatu a lu macellu
massacratu assai di botti
scannatu pi ciareddu
‘Ntaccatu alli binari
nni ficiru na bomba
dda vicinu o mari
chiddu chi resta a so tomba
Suicidiu dissi u putiri
di Statu e criminali
chiaru lu so ardiri***
chistu lu finali
Eppoi cu sinni futti
un comunista in menu
a fini fussi i tutti
ci passassi ‘ncoddu un trenu
A dda mamma dispirata
‘nto linzolo ci u puttaru civa civa
straziu di cutiddata
duluri chi mai cchiù finìa
Ciancìa senza cchiù lacrimi
“Chistu nun è me figghiu”
‘nchiusu ‘nta quattro tavuli
pi carni di battagghiu
Di tutti li paisi
arrivunu i cumpagni
i facci sunnu tisi
l’occhi chiddi di stagni
‘Ncumpagnunu a so bara
milli banneri russi
troppu a pacoi cara
a lotta pi ccu scava ogni ionnu li so fossi
I pugni ittati all’aria
ancora pi ccu mori
semu na maniata
tanti occhi un sulu cori
Un sulu cori malatu
ma ancora na spiranza
di stu mundu disgraziatu
s’avi a fari na mattanza
Facemu allura straziu
di cu cumanda ora
si semu un sulu brazzu
Pippinu è vivu ancora
Domenico Mostaccio
<mostaccio@email.it>
*Poesia liberamente ispirata al film “I cento passi” di Marco Tullio Giordana.
**Riferimento esplicito alla linea moderata e concertativa del Partito Comunista Italiano.
***L’“ardiri” cui si fa riferimento è evidentemente quello di Peppino Impastato. Per lo Stato il giovane comunista ebbe appunto l’ardire di porre in essere un gesto criminale e terrorista nel fare saltare in aria i binari del treno. Sono i giorni della morte di Aldo Moro: 9 Maggio 1978, come Peppino. Troppo evidente l’intento di farlo passare per uno dei tanti “terroristi”, peraltro maldestro e poco avveduto. Qualche anno e tanti depistaggi prima di scoprire finalmente chi erano i veri “terroristi”.
—